Román Rodríguez reúnese co novo presidente da Axencia para a Calidade do Sistema Universitario de Galicia para abordar os retos de futuro da entidade

O conselleiro de Educación, Ciencia, Universidades e Formación Profesional, Román Rodríguez, reuniuse esta mañá co novo presidente do Consorcio da Axencia para a Calidade do Sistema Universitario de Galicia (ACSUG), Juan José Nieto Roig, para analizar os retos de futuro da entidade. Na xuntanza tamén estivo presente a presidenta saínte, María Patrocinio Morrondo, a quen o conselleiro agradeceu “o labor e compromiso” amosado desde o ano 2009 que exerceu no cargo.

A ACSUG ten como misión fundamental contribuír á mellora da calidade do Sistema Universitario de Galicia e que este se manteña permanentemente actualizado e adaptado ás necesidades sociais cambiantes. Para lograr os seus obxectivos, elabora informes, avaliacións, certificacións e acreditacións das actividades que desenvolven as universidades galegas, especialmente as referidas á docencia, á investigación, a transferencia de coñecemento e á xestión.